ბავშვებთან და ბავშვებისთვის...
კივიტას გეორგიკა ბავშვთა დაცვისა და კეთილდღეობის მიმართულებით დაარსების დღიდან არაერთ პროექტს ახორციელებს.
ბავშვთა დაცვისა და კეთილდღეობის მიმართულებით კივიტასის გუნდი მუშაობს პოლიტიკის დონეზე - ადვოკატირების კუთხით და თავად ბავშვებთან და იმ ზრდასრულებთან, რომლებსაც ბავშვის ცხოვრებაზე გავლენის მოხდენა შეუძლიათ.
ორგანიზაციაში მოქმედებს ბავშვის დაცვის პროტოკოლი.
ჩვენ ვმუშაობთ ბავშვთა ძალადობისგან დაცვაზე, მხარს ვუჭერთ საგანმანათლებლო დაწესებულებებს, რომ განივითარონ კომპეტენციები ძალადობისგან დაცვის მხრივ, ვეხმარებით პროფესიონალებს მუნიციპალიტეტებში, რომ გაიუმჯობესონ ცოდნა რათა შეძლონ ბავშვის საუკეთესო ინტერესის დაცვა.
საერთაშორისო ასოციაცია კივიტას გეორგიკა სკოლამდელი განათლების მიმართულებით 15 წელზე მეტია მუშაობს. პოლონურ არასამთავრობო ორგანიზაციასთან პარტნიორობით, კივიტასმა შეიმუშავა და დანერგა სკოლამდელი განათლების დივერსიფიცირებული და ინოვაციური მიდგომა “ალტერნატიული სკოლამდელი განათლების” მოდელი, რომელმაც UNICEF მოწონება დაიმსახურა და საფუძვლად დაედო სასკოლო მზაობის ეროვნულ პროგრამას, მოვამზადეთ სასკოლო მზაობის კურიკულუმი „ბასკო“, ჩამოვაყალიბეთ სკოლამდელი განათლების ეროვნული ასოციაცია და ბენჩმარკინგის მონაცემთა ეროვნული ბაზა, ორგანიზაციამ განახორციელა ფართომასშტაბიანი კვლევა COVID-19 პანდემიის გავლენაზე საქართველოში სკოლამდელი განათლების სისტემაზე.
ჩვენი გუნდი ჩართულია სკოლამდელი განათლების რეფორმის განხორციელებაში და აქტიურად მუშაობს პოლიტიკის ადვოკატირების დონეზე. ცენტრალურ ხელისუფლებასთან ერთად, კივიტასი სკოლამდელი განათლების მიმართულებით ადგილობრივ თვითმმართველობებთან მუშაობს, როგორც ადვოკატირების, ისე კომპეტენციების განვითარების მიმართულებით. სკოლამდელი განათლების ხარისხისა და ხელმისაწვდომობის გაზრდისთვის კივიტას გეორგიკა მუშაობს სკოლამდელი განათლების დაწესებულებების ადიმინსტრაციულ და საგანმანათლებლო პერსონალთან, ხელს უწყობს ინფრასტრუქტურის განვითარებას, ახორციელებს კვლევებს და საგანმანათლებლო აქტივობებს.
ბოლო წლების განმავლობაში, კივიტასმა მიგრაციის მიმართულებით ისეთ თემაზე დაიწყო მუშაობა, რომელიც საქართველოში ჯერ კიდევ შეუსწავლელი და უხილავია.
მიგრაციის ნეგატიური გავლენა ყველაზე მეტად აისახება იმ ბავშვებზე, რომელიც სამშობლოში რჩებიან მშობლის/მშობლების ემიგრაციაში წასვლის შედეგად. სწორედ ამ ბავშვების საჭიროებების კვლევის, ადვოკატირებისა და პროფესიონალების გაძლიერების მიმართულებით ვმუშაობთ, როგორც ცენტრალურ, ისე მუნიციპალურ დონეზე. ვეხმარებით პროფესიონალებს, დაინახონ ბავშვების საჭიროებები, ვაძლიერებთ მუნიციპალიტეტის პასუხისმგებელ უწყებებს, რათა გადადგან ნაბიჯები ბავშვებისა და დარჩენილი ოჯახების მხარდასაჭერად.
მიგრაციის მიმართულებით კივიტასის გამოცდილება დაკავშირებულია ქალებთან, რომლებიც საზღვარგარეთ იმყოფებიან ემიგრაციაში და მათ საჭიროებებთან.
გენდერული თანასწორობის მიმართულებით მუშაობა მას შემდეგ დავიწყეთ, რაც იმ ქალების მხარდამჭერი პროექტი განვახორციელეთ, რომლებიც არ არიან დასაქმებულნი, არც ფორმალური განათლება აქვთ და არც არაფორმალური განათლების მიმართულებით არიან ჩართულნი (NEET).
გენდერულად ტრანსფორმაციულ ან/და პასუხისმგებლობიან მიდგომაზე დაფუძნებული თითოეული პროექტი, რომელსაც ორგანიზაცია ახორციელებს.
კივიტას გეორგიკა ერთ-ერთი პირველი ქართული არასამთავრობო ორგანიზაციაა, რომელიც ჩამოყალიბების დღიდან მუშაობს ადგილობრივი მმართველობის და თვითმმართველობის საკითხებზე, აკვირდება და აანალიზებს საქართველოს რეგიონების სოციალურ და ეკონომიკურ განვითარებას, ცდილობს ხელი შეუწყოს სასოფლო ტერიტორიების განვითარებას, მათ შორის ხარისხიანი სერვისების ჩამოყალიბების სახით.
ჩვენ მხარს ვუჭერთ დეცენტრალიზაციას და საზოგადოების ფართო მონაწილეობას გადაწყვეტილების მიღების პროცესში. ორგანიზაცია არის დეცენტრალიზაციის კოალიციის წევრი და იდგა საქართველოს ადგილობრივ თვითმმართველობათა ეროვნული ასოციაციის (ათეა) ჩამოყალიბების სათავეებთან და აგრძელებს მჭდრო თანამშრომლობას.
როგორც ევროპის ტრენინგ ორგანიზაციათა ქსელის წევრი, კივიტას გეორგიკა ცდილობს ხელი შეუწყოს თვითმმართველობის მოხელეთა კვალიფიკაციის ამაღლებას საერთაშორისო და ადგილობრივი ექსპერტიზით, საუკეთესო პრაქტიკების გაზიარებით და ინტერმუნიციპალური თანამშრომლობის წახალისებით.
დემოკრატია უნდა აძლევდეს მოქალაქეებს შესაძლებლობას განახორციელონ საკუთარი ინტერესები. კივიტას გეორგიკა თანამშრომლობს ფორმალურ და არაფორმალურ ჯგუფებთან, ახალგაზრდა ლიდერებთან და აქტივისტებთან იმისათვის რომ გაიზარდოს სამოქალაქო ჩართულობა მონაწილეობაზე დაფუძნებული გადაწყვეტილების მიღების პროცესის უზრუნველსაყოფად საქართველოს რეგიონებში.
გადაწყვეტილების მიღების პროცესში სათემო მონაწილეობა, ინფორმაციის საჯაროობა და ხელმისაწვდომობა, გამჭვირვალება და სოციალური ანგარიშვალდებულება. ეს ის თემებია, რომელიც მუდმივად არის ორგანიზაციის ინტერესის საგანი.
გამჭვირვალობის და სოციალური ანგარიშვალდებულების ასამაღლებლად კივიტასი მჭიდროდ თანამშრომლობდა 28 მუნიციპალიტეტთან მსოფლიო ბანკის მხარდაჭერით განხორციელებულ პროექტში; სამოქალაქო მონაწილეობის და ადგილობრივი დემოკრატიის თემაზე კივიტასმა მოამზადა და თარგმნა 10-მდე ბროშურა და პუბლიკაცია, მუდმივად ატარებს შეხვედრებს და ტრენინგებს სამიზნე მუნიციპალიტეტებში.
განსაკუთრებით მნიშვნელოვანია უმცირესობების მონაწილეობა მართვაში და საკუთარი ინტერესების ადვოკატირებაში. ინოვაციურმა პროექტმა „უმცირესობების ხმები ცვლილებებისთვის“ ხელი შეუწყო 38 თემის ინტერესების ასახვას ადგილობრივ ბიუჯეტში.
2010 წლიდან ორგანიზაციამ დაიწყო კრიზისული სიტუაციების დახმარების და ბუნებრივი კატასტროფების რისკების შემცირების და რეაგირების პროექტების განხორციელება საქართველოს რეგიონებში. მოხდა წყალდიდობის ადრეული გაფრთხილების სისტემების მონტაჟი, სახანძრო მზადყოფნის ამაღლების და რეგირების პროექტების განხორციელება მთიან რეგიონებში, მოხალისე მაშველების მომზადება და სხვ.
ასევე, 2018-2019 წლებში ორგანიზაციამ ჩაატარა 7 მუნიციპალიტეტის ინფრასტრუქტურის შეფასება ხანძარსაწინააღმდეგო და კრიზისული სიტუაციების მზაობისთვის და შექმნა მონაცემთა ბაზა.
საწარმოო ნარჩენები თუ სტიქიური ნაგავსაყრელები, ზღვის დაბინძურება პლასტიკით საქართველოს ეკოლოგიისთვს ერთ-ერთ სერიოზულ პრობლემასა და გამოწვევას წარმოადგენს. კივიტას გეორგიკა თურქეთის, ბულგარეთის და უკრაინის პარტნიორ ორგანიზაციებთან ერთად ცდილობს საცხოვრებლად სუფთა და ჯანსაღი გარემოს შექმნას შეუწყოს ხელი. სანაპირო ზოლის ინტეგრირებული მართვისთვისთვის და შავი ზღვის დაბინძურების შესმცირებლად 2014-2022 წლებში რამდენიმე პროექტი განვახორციელეთ, ხოლო 2021-2022 წლებში ლანჩხუთის მუნიციპალიტეტის ახალგაზრდებთან ერთად ნარჩენების მართვის სისტემის გაუმჯობესებისთვის მონიტორინგი ჩავატარეთ და საინფორმაციო სისტემა მოვამზადეთ.
განათლებას გადამწყვეტი როლი აქვს ახალგაზრდების დემოკრატიულ და პასუხისმგებელ მოქალაქეებად ჩამოყალიბებაში. მოქალაქეობრივი აღზრდა დემოკრატიული პრინციპების და ღირებულებების შესწავლით, უფლებებისა და მოვალეობების შესახებ ცნობიერების ამაღლების, პასუხისმგებლობის გრძნობის განვითარების გზით არის შესაძლებელი. კივიტას გეორგიკას მიაჩნია, რომ დემოკრატიული მოქალაქეობა, ადამიანის უფლებების პატივისცემა და კულტურათაშორისი გაგება უფრო ეფექტურად ისწავლება „კეთებით“, ვიდრე ფორმალური „ცოდნის“ დაგროვებით. ამიტომ, საერთაშორისო ვიშეგრადის ფონდის მხარდაჭერით კივიტას გეორგიკა თანამშრომლობს სკოლებთან, ბიბლიოთეკებთან და მუნიციპალიტეტებთან, რათა დანერგოს „სწავლა კეთებით მეთოდოლოგია აქტიური მოქალაქეობისთვის“, აამაღლოს მასწავლებელთა დემოკრატიული კომპეტენციები.
კივიტასმა დანერგა საქართველოში სასკოლო დებატების პროგრამა „გზა პარლამენტისკენ“, რომელიც ფარგლებშიც მოსწავლეების დებატები 60-ზე მეტ საჯარო სკოლაში გაიმართა, ჩამოყალიბდა დებატ კლუბები სკოლებსა თუ უმაღლეს სასწავლებლებში ახალგაზრდებს შორის კრიტიკული აზროვნებისა და დემოკრატიული მოქალაქეობის კომპეტენციების განვითარებისთვის.
ახალგაზრდული ინციატივების წახალისებისთვის, ჩეხურ ორგანიზაციებთან თანამშრომლობით, კივიტას გეორგიკამ ჩაატარა საჯარო ლექციების ციკლი, ჩამოაყალიბა აქტივისტების გუნდები მუნიციპალიტეტებში და ეხმარება მუნიციპალიტეტებს ახალგაზრდული პოლიტიკის შემუშავებაში.